Дэлхийн зах зээлийн тойм: Бүс нутгийн тогтворгүй байдал ба төв банкуудын “хүлээлтийн” тактик

(2026.04.22 – 04.29)

Өнгөрсөн долоо хоногт дэлхийн санхүүгийн зах зээл бүс нутгийн тогтворгүй байдал, эрчим хүчний үнийн өсөлт болон төв банкуудын бодлогын тодорхойгүй байдлын дунд өндөр хэлбэлзэлтэй арилжаалагдлаа. АНУ–Ираны мөргөлдөөн, Хормузын хоолойн тээвэрлэлтийн саатал, мөн инфляцын дахин сэргэх эрсдэл нь хөрөнгө оруулагчдыг илүү болгоомжтой байр суурь баримтлахад хүргэж, зах зээлд “risk-off” төлөв давамгайлав.

Макро эдийн засаг: Инфляц ба Fed-ийн болгоомжлол

АНУ-ын инфляцын дарамт бүрэн намжаагүй хэвээр байна. BEA-ийн хамгийн сүүлийн мэдээллээр 2-р сарын PCE инфляц жилийн дүнгээр 2.8% байсан бол дараагийн PCE тайлан 4-р сарын 30-нд гарахаар байна. Энэ нь Fed-ийн 2%-ийн зорилтот түвшнээс өндөр хэвээр байгаа тул бодлогын хүүг хурдан бууруулах орон зай хязгаарлагдмал байна.

Reuters-ийн санал асуулгаар FED 2026 онд хүү бууруулах шийдвэрээ наад зах нь хэдэн сараар хойшлуулах магадлалтай гэж эдийн засагчид үзэж байна. Үүнд Ойрхи Дорнодын мөргөлдөөнөөс үүдэлтэй эрчим хүчний үнийн өсөлт, инфляцын хоёр дахь давлагааны эрсдэл голлон нөлөөлж байна.

Түүхий эд: Нефтийн нийлүүлэлтийн эрсдэл ба алтны хамгаалах эрэлт

Нефтийн зах зээл долоо хоногийн турш хүчтэй савлав. Хормузын хоолойн саатал болон Ираны эсрэг хориг, бүс нутгийн цэргийн хурцадмал байдал нь нийлүүлэлтийн эрсдэлийг өсгөж, Brent нефтийн үнийг $110-аас дээш түвшинд хүргэлээ.

Алтны хувьд геополитикийн эрсдэл, инфляцын хамгаалалт гэсэн хоёр хүчин зүйл эрэлтийг дэмжиж байгаа ч ам.долларын ханш болон бондын өгөөж өсөх нь өсөлтийг хязгаарлаж байна. Reuters-ийн мэдээлснээр алт долоо хоногийн дүнгээр буурах төлөвтэй байсан ч зах зээл инфляц болон АНУ–Ираны нөхцөл байдлыг анхааралтай ажигласан хэвээр байна.

Форекс: Ам.долларын давуу байдал ба йенийн эмзэг байдал

Ам.доллар өндөр хүүгийн хүлээлт, аюулгүй хөрөнгийн эрэлтээр дэмжигдэж байна. Харин Японы йен сул хэвээр байгаа ч BoJ-ийн сүүлийн шийдвэрийг бүрэн “зөөлөн” гэж дүгнэхэд эрт байна. Японы Төв банк бодлогын хүүгээ 0.75% дээр хадгалсан ч 9 гишүүний 3 нь хүүг 1.0% болгох санал гаргасан нь инфляцын дарамтад илүү анхаарч эхэлснийг харуулж байна.

Евро болон фунтын хувьд нөхцөл байдал илүү төвөгтэй байна. ECB болон BoE хүүгээ хэвээр хадгалах хүлээлттэй байгаа ч эрчим хүчний үнийн өсөлт инфляцын дарамтыг нэмэгдүүлж байгаа тул “хүү бууруулах” бус, харин хүүг удаан хугацаанд өндөр хадгалах эсвэл зарим тохиолдолд дахин өсгөх эрсдэл нэмэгдэж байна.

Ирэх өдрүүдэд анхаарах мэдээ:

Зах зээлийн гол анхаарал Fed-ийн 4-р сарын 29–30-ны хурлын шийдвэр, 4-р сарын 30-ны PCE инфляцын тайлан болон 5-р сарын 8-нд гарах АНУ-ын (NFP) хөдөлмөрийн зах зээлийн тайланд төвлөрнө.

Хэрэв Fed бодлогын хүүгээ хэвээр хадгалж, инфляцын эрсдэлийг онцолсон хатуу байр суурь илэрхийлбэл ам.доллар үргэлжлэн дэмжигдэх магадлалтай. Харин Ойрхи Дорнодод дипломат ахиц гарч, Хормузын тээвэрлэлт тогтворжвол нефтийн үнэ богино хугацаанд буурах боломжтой.

Одоогийн зах зээлийн орчин инфляц, геополитик, төв банкны бодлогын хүлээлт гэсэн гурван гол хүчин зүйлээс хамааран маш мэдрэмтгий байна. Ийм нөхцөлд хөрөнгө оруулагчид болон арилжаачид богино хугацааны огцом савлагаанаас болгоомжилж, хэт өндөр эрсдэлтэй position нээхээс зайлсхийж, эрсдэлийн удирдлагатай стратеги баримтлах нь зүйтэй.